शिवसेना (उद्धव बाळासाहेब ठाकरे) पक्ष आक्रमक
डाव्या-उजव्या कालव्यांची तातडीने साफसफाई व दुरुस्ती करण्याची पाटबंधारे विभागाकडे मागणी
दिगंबर चंदने | कर्जत :
कर्जत तालुक्यात यंदा पावसाचे प्रमाण कमी झाल्याने दुष्काळसदृश परिस्थिती निर्माण झाली असून, शेतकऱ्यांसमोर शेतीच्या सिंचनासाठी पाण्याचा प्रश्न गंभीर बनण्याची शक्यता आहे. अशा परिस्थितीत शेतकऱ्यांच्या पिकांचे संभाव्य नुकसान टाळण्यासाठी राजनाळा कालव्याच्या डाव्या व उजव्या कालव्यांची तातडीने साफसफाई आणि आवश्यक दुरुस्ती करून नोव्हेंबर महिन्याच्या अखेरीस कालव्यांमधून पाणी सोडण्यात यावे, अशी जोरदार मागणी शिवसेना (उद्धव बाळासाहेब ठाकरे) पक्षाच्या कर्जत तालुका पदाधिकाऱ्यांनी केली आहे.
यासंदर्भात शिवसेना (उबाठा) पक्षाच्या वतीने पाटबंधारे विभाग, कर्जत येथील शाखा उपअभियंता यांना लेखी निवेदन देण्यात आले आहे.
राजनाळा कालव्याच्या डाव्या व उजव्या कालव्यांमधून पाणी सोडण्याचे नियोजन डिसेंबर महिन्यात करण्यात येणार असल्याचे समजते. मात्र, सध्याची पावसाची परिस्थिती आणि शेतीसाठी निर्माण झालेली पाण्याची गरज लक्षात घेता डिसेंबर महिन्यापर्यंत प्रतीक्षा करणे शेतकऱ्यांसाठी अडचणीचे ठरू शकते. पिकांना आवश्यक त्या वेळी पाणी उपलब्ध झाले नाही, तर शेतकऱ्यांच्या मेहनतीवर पाणी फिरण्याची तसेच पिकांचे मोठ्या प्रमाणात नुकसान होण्याची भीती व्यक्त केली जात आहे.

शेती हा ग्रामीण भागातील अनेक कुटुंबांच्या उदरनिर्वाहाचा प्रमुख आधार आहे. त्यामुळे सिंचनासाठी वेळेत पाणी उपलब्ध होणे अत्यंत आवश्यक आहे. कालव्यांमधून पाणी सोडण्यापूर्वी डाव्या आणि उजव्या कालव्यांमधील गाळ, झाडेझुडपे व इतर अडथळे दूर करून संपूर्ण कालव्यांची साफसफाई करणे गरजेचे आहे. तसेच कालव्यांच्या ठिकठिकाणी आवश्यक असलेली दुरुस्ती करून पाणी सुरळीतपणे शेतापर्यंत पोहोचेल, याची दक्षता संबंधित विभागाने घ्यावी, अशी मागणी निवेदनातून करण्यात आली आहे.
केवळ पाणी सोडण्याचे नियोजन करून चालणार नाही, तर ते पाणी योग्य वेळी आणि सुरळीतपणे शेतकऱ्यांच्या बांधापर्यंत पोहोचणेही तितकेच महत्त्वाचे आहे. त्यामुळे पाटबंधारे विभागाने या मागणीचे गांभीर्य ओळखून तातडीने कामाला सुरुवात करावी आणि नोव्हेंबर महिन्याच्या अखेरीस राजनाळा कालव्यांमधून पाणी सोडण्याची व्यवस्था करावी, अशी आग्रही भूमिका शिवसेना पदाधिकाऱ्यांनी मांडली आहे.
शेतकऱ्यांचे संभाव्य नुकसान टाळण्यासाठी पाटबंधारे विभागाने या निवेदनाची दखल घेऊन सकारात्मक निर्णय घ्यावा. शेतकऱ्यांच्या हिताला प्राधान्य देत कालव्यांची साफसफाई, दुरुस्ती आणि पाणी सोडण्याबाबत तातडीने कार्यवाही करावी, अशी अपेक्षा शिवसेना (उद्धव बाळासाहेब ठाकरे) पक्षाच्या वतीने व्यक्त करण्यात आली आहे.
यावेळी शिवसेनेचे तालुकाप्रमुख बाजीराव दळवी, तालुका संघटक माधव कोळंबे, तालुका सचिव रामदास घरत, ज्येष्ठ शिवसैनिक सुरेश बोराडे यांच्यासह शिवसेनेचे इतर पदाधिकारी व शिवसैनिक उपस्थित होते.
शेतकऱ्यांच्या प्रश्नासाठी शिवसेनेने पुढाकार घेत पाटबंधारे विभागाकडे केलेल्या या मागणीवर आता संबंधित प्रशासन काय निर्णय घेते, याकडे कर्जत तालुक्यातील शेतकऱ्यांचे लक्ष लागले आहे.







