मुख्यमंत्री सहायता निधीपासून आयुष्मान भारतपर्यंत गरजूंच्या मदतीसाठी अविरत सेवाकार्य
आयुर्वेद तज्ज्ञ म्हणून ओळख असलेले डॉ. ओमप्रकाश शेटे हे केवळ डॉक्टर नाहीत, तर महाराष्ट्रातील सर्वसामान्य माणसाशी नाळ जोडलेले एक सेवाभावी व्यक्तिमत्त्व आहे.
दिगंबर चंदने | कर्जत:
गडर न्यूजच्या विशेष कार्यक्रमात दोन शाळकरी मुलींनी घेतलेल्या मुलाखतीत त्यांनी आपल्या प्रदीर्घ सेवाकार्याचा आढावा घेतला.
यापूर्वी ते मुख्यमंत्री सहायता निधीचे प्रमुख म्हणून कार्यरत होते. त्या काळात त्यांनी मुख्यमंत्री सहायता निधी ही योजना तळागाळातील, गरजू आणि वंचित लोकांपर्यंत पोहोचवली.
पैशांअभावी उपचार थांबलेल्या अनेक कुटुंबांना त्यांनी तत्काळ मदत मिळवून दिली. रुग्णालयाचा खर्च, शस्त्रक्रिया, औषधोपचार अशा अडचणीत सापडलेल्या प्रत्येक गरजू माणसापर्यंत ते स्वतः पोहोचले.
त्यांच्या या कामामुळेच मुख्यमंत्री सहायता निधी संपूर्ण महाराष्ट्रात घराघरात परिचित झाला. त्याचबरोबर डॉ. ओमप्रकाश शेटे हे नाव देखील महाराष्ट्राच्या प्रत्येक घरात पोहोचले.
आज ते आयुष्मान भारत योजनेच्या माध्यमातूनही त्याच तळमळीने काम करत आहेत. आयुष्मान भारत योजनेमुळे गावातील गरीब कुटुंबाला मोठ्या दवाखान्यात मोफत उपचार मिळत आहे, असे त्यांनी यावेळी सांगितले.
आयुर्वेद हा आपल्या परंपरेचा ठेवा आहे. आयुर्वेद आणि आधुनिक उपचार पद्धती यांचा योग्य संगम साधल्यास रुग्णाला लवकर आणि कायमस्वरूपी आराम मिळतो, असा विश्वास त्यांनी व्यक्त केला.
खुर्चीवर बसून नाही, तर लोकांमध्ये जाऊन काम करणारे डॉक्टर म्हणून डॉ. शेटे यांची ओळख आहे. सामान्य माणसापर्यंत पोहोचणे, हेच त्यांच्या कामाचे खरे यश आहे, असे त्यांनी मुलाखतीत आवर्जून सांगितले.
त्यांच्या या कार्यामुळे महाराष्ट्राच्या सर्वसामान्य माणसाच्या मनात त्यांनी कायमचे स्थान निर्माण केले आहे.







