नवीन कार्यकारिणीचा पदग्रहण सोहळा उत्साहात
महिला सक्षमीकरणासह सामाजिक उपक्रमांचा संकल्प
सोनिया जोशी | कर्जत:
इनरव्हील क्लब ऑफ कर्जतच्या नवनिर्वाचित कार्यकारिणीचा पदग्रहण सोहळा नुकताच कर्जत येथील रॉयल गार्डनच्या सभागृहात उत्साहपूर्ण वातावरणात पार पडला. यावेळी कश्यपी ठक्कर यांनी क्लबच्या अध्यक्षपदाची सूत्रे स्वीकारली. महिला सबलीकरण, सक्षमीकरण आणि सामाजिक बांधिलकीच्या माध्यमातून विविध उपक्रम राबविण्याचा संकल्प यावेळी करण्यात आला.
या पदग्रहण सोहळ्यास रायगड डिस्ट्रिक्टच्या संपादिका सारिका धोत्रे तसेच कर्जत आरपीएफच्या सब-इन्स्पेक्टर प्रतिभा देशमुख प्रमुख अतिथी म्हणून उपस्थित होत्या. त्यांच्या हस्ते कश्यपी ठक्कर यांचा अध्यक्षपदाचा पदभार सोपविण्याचा कार्यक्रम पार पडला.
कार्यक्रमाची प्रस्तावना इनरव्हील क्लब ऑफ कर्जतच्या फाउंडर मोनिका बडेकर यांनी केली. क्लबच्या स्थापनेपासून मागील दहा वर्षांच्या कार्याचा आढावा त्यांनी थोडक्यात उपस्थितांसमोर मांडला. त्यानंतर मागील वर्षाच्या कोषाध्यक्ष वैशाली मुसळे यांनी प्रमुख पाहुण्यांचे स्वागत करून शारदा वंदना सादर केली.
क्लबच्या माजी अध्यक्षा शिल्पा दगडे यांनी मागील वर्षभरात इनरव्हील क्लब ऑफ कर्जतच्या माध्यमातून राबविण्यात आलेल्या विविध सामाजिक उपक्रमांची माहिती दिली. समाजातील गरजू घटकांना मदत, महिला व सामाजिक विकासासाठी राबविण्यात आलेले उपक्रम तसेच विविध जनजागृती कार्यक्रमांचा त्यांनी आढावा घेतला.
यावेळी मार्गदर्शन करताना रायगड डिस्ट्रिक्टच्या संपादिका सारिका धोत्रे यांनी महिला सबलीकरण, सक्षमीकरण आणि सशक्तिकरण या त्रिसूत्रीवर भर देत, इनरव्हील क्लबच्या माध्यमातून राबविण्यात येणाऱ्या प्रकल्पांद्वारे या विचारांचा प्रभावी प्रचार व प्रसार करण्याचे आवाहन केले. महिलांनी समाजाच्या सर्व क्षेत्रांत आत्मविश्वासाने पुढे येऊन सामाजिक परिवर्तनात योगदान द्यावे, असेही त्यांनी सांगितले.
कर्जत आरपीएफच्या सब-इन्स्पेक्टर प्रतिभा देशमुख यांनी महिलांच्या सुरक्षिततेबाबत मार्गदर्शन केले. सामाजिक कार्यात महिलांनी एकमेकींना सहकार्य करण्याबरोबरच आपल्या सुरक्षिततेबाबत जागरूक राहणे आवश्यक असल्याचे त्यांनी नमूद केले. महिलांना सुरक्षिततेचे धडे देणारे आणि आत्मविश्वास वाढविणारे उपक्रम राबविण्याचे आवाहन त्यांनी केले.
कार्यक्रमाच्या निमित्ताने कर्जतच्या निसर्गरम्य वातावरणाचे संवर्धन करण्याचा संदेश देत उपस्थितांना झाडांची रोपे भेट म्हणून देण्यात आली. प्रत्येकाने वृक्षारोपण करून पर्यावरण संवर्धनात योगदान द्यावे, असा संदेश या उपक्रमातून देण्यात आला.
इनरव्हील क्लब ऑफ कर्जतच्या सामाजिक कार्याची दखल घेत यावर्षी पाच नवीन सदस्यांनी क्लबमध्ये प्रवेश केला. त्यामुळे क्लबच्या सामाजिक कार्याचा विस्तार होण्यास तसेच आगामी काळात विविध समाजोपयोगी उपक्रम अधिक व्यापक स्वरूपात राबविण्यास मदत होणार आहे.
इनरव्हील क्लब ऑफ कर्जतच्या नूतन कार्यकारिणीत अध्यक्षा कश्यपी ठक्कर, उपाध्यक्षा प्राची चौडिये, सचिव वैशाली मुसळे, कोषाध्यक्ष वनिता सोनी, आयएसओ पल्लवी सावंत, संपादिका उज्वला पाटील, आयपीपी शिल्पा दगडे आणि सीसी मनीषा साबणे यांची निवड करण्यात आली.
तसेच सल्लागार समितीची जबाबदारी उत्तरा वैद्य, सरस्वती चौधरी, मोनिका बडेकर आणि अवंतिका गायकर यांच्याकडे सोपविण्यात आली.
या पदग्रहण सोहळ्यास क्लबच्या सदस्य संजीवनी घुमरे, करुणा पराडकर, शीतल पाटील आणि रूपा खनाल यांच्यासह अन्य सदस्य उपस्थित होते. नव्या कार्यकारिणीचे अभिनंदन करून आगामी सामाजिक उपक्रमांसाठी शुभेच्छा देण्यात आल्या.
