पाणी, स्वच्छता, हातगाड्या, डम्पिंग ग्राउंड, सीसीटीव्हीसह विविध प्रश्नांवर प्रशासनासमोर मुद्देसूद चर्चा
सुधाकर घारे यांची प्रमुख उपस्थिती
नरेश जाधव | कर्जत:
कर्जत शहरातील नागरिकांना भेडसावणाऱ्या विविध प्रलंबित समस्यांवर सविस्तर चर्चा करून त्यावर तातडीने उपाययोजना करण्याच्या दृष्टीने बुधवार, दि. ९ सप्टेंबर २०२६ रोजी कर्जत बचाव समितीची आढावा बैठक कर्जत नगरपरिषद कार्यालयात आयोजित करण्यात आली. दुपारी २.३० वाजता सुरू झालेल्या या बैठकीस कर्जत नगरपरिषदेचे मुख्याधिकारी, नगराध्यक्ष, उपनगराध्यक्ष, परिवर्तन विकास आघाडीचे समन्वयक तथा रायगड जिल्हा राष्ट्रवादी काँग्रेस पक्षाचे अध्यक्ष सुधाकर भाऊ घारे, तसेच परिवर्तन विकास आघाडीचे नगरसेवक उपस्थित होते.
कर्जत शहर बचाव समितीच्या वतीने समितीचे कार्यवाहक ॲड. कैलास मोरे, रंजन दातार, पत्रकार रमाकांत जाधव, ज्येष्ठ सदस्य विजय गोखले, विजय बेडेकर, सतीश मुसळे, श्रीमती स्वीटी बार्शी, प्रशांत उगले, अतुल पवार, पत्रकार जगदीश दगडे, पत्रकार विद्यानंद ओव्हाळ यांच्यासह अन्य मान्यवर उपस्थित होते.
मागील बैठकीतील प्रश्नांवर प्रशासनाकडून आढावा
बैठकीच्या सुरुवातीला ॲड. कैलास मोरे यांनी मागील बैठकीत समितीच्या वतीने मांडण्यात आलेल्या विविध प्रश्नांवर नगरपरिषद प्रशासनाने केलेल्या कार्यवाहीचा सविस्तर आढावा मुख्याधिकारी यांच्याकडे मागितला. त्यानंतर शहरातील महत्त्वाच्या प्रश्नांवर एक-एक करून चर्चा करण्यात आली.
पाणी प्रश्नावर उपाययोजनांना वेग
कर्जत शहरातील गंभीर समस्या असलेल्या पाणी प्रश्नावर नगरपरिषदेकडून विविध उपाययोजना सुरू असल्याचे बैठकीत स्पष्ट झाले. शहरातील पाण्याच्या टाक्यांची साफसफाई करण्यात आली असून ज्या भागांमध्ये कमी दाबाने पाणीपुरवठा होत आहे, त्या ठिकाणी आवश्यक उपाययोजना सुरू असल्याची माहिती देण्यात आली.
तसेच एक्सप्रेस फिडरच्या प्रश्नामुळे पाणीपुरवठ्यासंदर्भात काही अडचणी निर्माण होत असल्याचे निदर्शनास आले. हा प्रश्न समिती व नगरपरिषद यांच्या माध्यमातून सोडविण्यासाठी प्रयत्न केले जाणार असून, या कामी सुधाकर भाऊ घारे यांनी सर्वतोपरी सहकार्य करण्याची भूमिका व्यक्त केली.
जंतुनाशक फवारणीबाबत आरोग्य विभागाला सूचना
शहरात डास व कीटकांचा प्रादुर्भाव रोखण्यासाठी करण्यात येणाऱ्या जंतुनाशक फवारणीच्या नियोजनाबाबत समितीने आरोग्य अधिकारी रायन यांना जाब विचारला. कोणत्या भागात, कोणत्या दिवशी आणि किती वाजता फवारणी केली जाणार आहे, याची माहिती नागरिकांना उपलब्ध होणे आवश्यक असल्याचे समितीने स्पष्ट केले.
फवारणीचे वेळापत्रक नागरिकांच्या माहितीसाठी ग्रुपवर प्रसिद्ध करावे तसेच प्रत्यक्ष करण्यात आलेल्या कामाचे फोटोही ग्रुपवर टाकावेत, अशी स्पष्ट सूचना समितीच्या वतीने करण्यात आली. समितीच्या सूचना मान्य करून त्यानुसार कार्यवाही करण्याचे आश्वासन आरोग्य अधिकारी रायन यांनी दिले.
सार्वजनिक स्वच्छतागृहासाठी पुढाकार
कर्जत शहरात बाहेरून येणाऱ्या नागरिकांसाठी पुरेशा प्रमाणात सार्वजनिक स्वच्छतागृहांची सुविधा उपलब्ध नसल्याने मोठी गैरसोय होत असल्याचा मुद्दाही बैठकीत उपस्थित करण्यात आला. प्रशासकीय भवन परिसरात नागरिकांसाठी चांगल्या दर्जाचे सार्वजनिक स्वच्छतागृह उभारण्यासाठी सुधाकर भाऊ घारे सहकार्य करणार असल्याचे बैठकीत सांगण्यात आले.
मुख्य बाजारपेठेतील अनधिकृत हातगाड्यांचा प्रश्न ऐरणीवर
कर्जतच्या मुख्य बाजारपेठेतील हातगाड्यांच्या प्रश्नावर बैठकीत सविस्तर आणि जोरदार चर्चा झाली. नगरपरिषदेने अधिकृत मान्यता दिलेल्या हातगाड्यांची संख्या कमी असताना विनापरवाना हातगाड्यांची संख्या वाढत असल्याचे समितीच्या निदर्शनास आले.
यामुळे बाजारपेठेतील वाहतुकीला मोठा अडथळा निर्माण होत असून, नागरिकांना व वाहनचालकांना त्रास सहन करावा लागत असल्याचे समितीने स्पष्ट केले. काही हातगाडीधारकांचे निधन झालेले असतानाही त्यांच्या नावावरील परवाने अद्याप सुरू असल्याचा मुद्दाही उपस्थित करण्यात आला.
या सर्व बाबींची तपासणी करून अनधिकृत हातगाड्यांवर तसेच नियमबाह्य परवान्यांवर तातडीने योग्य ती कारवाई करावी, अशी मागणी समितीने केली.
गुंडगे डम्पिंग ग्राउंडच्या व्यवस्थापनावर प्रश्नचिन्ह
गुंडगे येथील डम्पिंग ग्राउंडबाबत नागरिकांच्या अनेक तक्रारी असल्याचे बैठकीत सांगण्यात आले. समितीचे सदस्य रंजन दातार यांनी आरोग्य अधिकारी रायन यांच्याकडे डम्पिंग ग्राउंडवर जमा होणाऱ्या कचऱ्यावर नेमकी कोणती प्रक्रिया केली जाते, याबाबत माहिती मागितली.
सद्यस्थितीत डम्पिंग ग्राउंडवरील कचऱ्यावर अपेक्षित पद्धतीने प्रक्रिया होत नसल्याचे दिसून येत असल्याचे समितीच्या वतीने निदर्शनास आणून देण्यात आले. या विषयावर रंजन दातार हे समितीच्या माध्यमातून नगरपरिषदेला आवश्यक मार्गदर्शन करणार असून, त्यासाठी सुधाकर भाऊ घारे यांनीही सहकार्य करण्याचे आवाहन केले.
शहरातील सुरक्षेसाठी सीसीटीव्ही कॅमेऱ्यांची मागणी
नागरिकांच्या सुरक्षिततेच्या दृष्टीने शहरातील महत्त्वाच्या ठिकाणी सीसीटीव्ही कॅमेरे बसविण्याचा प्रश्न देखील बैठकीत उपस्थित करण्यात आला. अद्याप आवश्यक त्या ठिकाणी अपेक्षित प्रमाणात सीसीटीव्ही कॅमेरे बसविण्यात आले नसल्याचे समितीने निदर्शनास आणले.
शहरातील संवेदनशील व गर्दीच्या ठिकाणी किमान आवश्यक संख्येने सीसीटीव्ही कॅमेरे बसविण्यात यावेत, अशी मागणी समितीने केली. यावर मुख्याधिकारी यांनी सकारात्मक भूमिका घेत योग्य ती कार्यवाही करण्याचे संकेत दिले.
भटक्या कुत्र्यांच्या निर्बीजीकरणाबाबत माहिती
शहरातील भटक्या कुत्र्यांचा वाढता प्रश्न यावरही चर्चा झाली. नगरपरिषदेने कुत्र्यांच्या निर्बीजीकरणासाठी एका सामाजिक संस्थेला ठेका दिला असून, त्या माध्यमातून मोठ्या प्रमाणात भटक्या कुत्र्यांचे निर्बीजीकरण करण्यात आले असल्याची माहिती आरोग्य अधिकारी रायन यांनी बैठकीत दिली.
गणेशोत्सवाच्या पार्श्वभूमीवर प्रशासन सज्ज
आगामी गणेशोत्सवाच्या पार्श्वभूमीवर शहरातील व्यवस्था यावरही चर्चा करण्यात आली. गणेशोत्सव काळात नगरपरिषद तसेच पोलीस विभागामार्फत आवश्यक ठिकाणी अधिकारी व कर्मचाऱ्यांची नियुक्ती करण्यात येणार आहे. उत्सवाच्या काळात नागरिकांना कोणत्याही प्रकारचा त्रास होऊ नये तसेच शहरातील व्यवस्था सुरळीत राहावी यासाठी नगरपरिषद प्रशासन तत्पर राहणार असल्याचे बैठकीत स्पष्ट करण्यात आले.
उर्वरित समस्यांवरही सकारात्मक चर्चा
कर्जत बचाव समितीच्या वतीने यापूर्वी देण्यात आलेल्या निवेदनातील इतर विविध समस्यांवरही बैठकीत सविस्तर चर्चा झाली. अनेक प्रश्नांवर नगरपरिषद प्रशासनाकडून उपाययोजना सुरू असल्याचे दिसून आले असून, उर्वरित प्रश्नही लवकरात लवकर मार्गी लावण्याची अपेक्षा समितीने व्यक्त केली.
बैठकीच्या शेवटी समितीचे कार्यवाहक ॲड. कैलास मोरे यांनी मुख्याधिकारी, नगराध्यक्ष, उपनगराध्यक्ष, परिवर्तन विकास आघाडीचे समन्वयक सुधाकर भाऊ घारे, सर्व नगरसेवक तसेच बैठकीस उपस्थित असलेल्या समितीच्या सर्व सदस्यांचे आभार मानले. नागरिकांच्या हिताच्या दृष्टीने मांडण्यात आलेले उर्वरित प्रश्नही प्रशासनाने प्राधान्याने सोडवावेत, अशी अपेक्षा त्यांनी व्यक्त केली.
कर्जत शहरातील नागरिकांच्या मूलभूत सुविधा, स्वच्छता, पाणीपुरवठा, वाहतूक, सुरक्षितता आणि सार्वजनिक आरोग्याशी संबंधित प्रश्नांवर प्रशासन व कर्जत बचाव समिती यांच्यात झालेली ही बैठक सकारात्मक ठरल्याचे चित्र दिसून आले.
