दहिवली-संजयनगरच्या स्ट्रीट लाईट दुरुस्तीला दुसऱ्याच दिवशी सुरुवात
रहिवासी तथा पत्रकार नरेश जाधव यांच्या पाठपुराव्याला यश
नगरपरिषदेची तातडीने दखल, पाहणीनंतर कामाला वेग
नरेश जाधव | कर्जत:
कर्जत नगरपरिषदेच्या प्रभाग क्रमांक २ मधील दहिवली-संजयनगर परिसरातील बंद पडणाऱ्या स्ट्रीट लाईटच्या समस्येला अखेर वाचा फुटली आहे. ‘रायगडचे वादळ’मध्ये या समस्येबाबत बातमी प्रसिद्ध झाल्यानंतर कर्जत नगरपरिषद प्रशासनाने दखल घेतली असून, प्रत्यक्ष पाहणी केल्यानंतर दुसऱ्याच दिवशी पथदिव्यांच्या दुरुस्तीच्या कामाला सुरुवात करण्यात आली आहे. रहिवासी, पत्रकार तथा ‘रायगडची झुंज न्यूज’चे संपादक नरेश जाधव यांनी केलेल्या पाठपुराव्याला यश आल्याने परिसरातील नागरिकांना दिलासा मिळण्याची आशा निर्माण झाली आहे.
बातमी प्रसिद्ध होताच प्रशासनाची हालचाल!
दहिवली-संजयनगर परिसरातील रस्त्यावरील स्ट्रीट लाईट वारंवार बंद पडत असल्याने नागरिकांना गैरसोयींचा सामना करावा लागत होता. यासंदर्भात संबंधित विभागाच्या निदर्शनास समस्या आणूनही अपेक्षित कार्यवाही होत नसल्याची तक्रार करण्यात आली होती. त्यामुळे नागरिकांच्या मूलभूत सुविधांबाबत प्रशासनाच्या कार्यपद्धतीवर प्रश्न उपस्थित करत ‘रायगडचे वादळ’मध्ये सविस्तर बातमी प्रसिद्ध करण्यात आली.
या बातमीची दखल घेत कर्जत नगरपरिषद प्रशासनाने पथदिव्यांच्या समस्येवर कार्यवाही सुरू केली. विशेष म्हणजे, बातमी प्रसिद्ध झाल्यानंतर दुसऱ्याच दिवशी दुरुस्तीच्या कामाला सुरुवात झाल्याने नागरिकांच्या प्रश्नांना वाचा फोडण्यासाठी प्रसारमाध्यमांनी केलेल्या पाठपुराव्याचे महत्त्व पुन्हा एकदा अधोरेखित झाले आहे.
नगरपरिषदेचे दीपक खेबडे यांच्या सूचनेनंतर लाड यांच्याकडून पाहणी
दहिवली-संजयनगर येथील पथदिव्यांच्या समस्येची दखल घेत कर्जत नगरपरिषद विभागाचे दीपक खेबडे यांनी नगरपरिषदेचे लाड यांना प्रत्यक्ष पाहणी करण्याच्या सूचना दिल्या होत्या. त्यानुसार शुक्रवार, दि. २ ऑक्टोबर २०२६ रोजी लाड यांनी पत्रकार तथा ‘रायगडची झुंज न्यूज’चे संपादक नरेश जाधव यांच्या समवेत परिसराची पाहणी केली.
या पाहणीदरम्यान बंद असलेल्या पथदिव्यांच्या समस्येबाबत माहिती घेण्यात आली. त्यानंतर शनिवार, दि. ३ ऑक्टोबर रोजी पथदिव्यांच्या दुरुस्तीच्या कामाला सुरुवात करण्यात आली. त्यामुळे अनेक दिवसांपासून प्रलंबित असलेल्या या समस्येवर प्रशासनाकडून प्रत्यक्ष कार्यवाही सुरू झाल्याचे चित्र आहे.
नगराध्यक्षा पुष्पाताई दगडे यांच्याकडेही मांडला होता प्रश्न
दहिवली-संजयनगर परिसरातील स्ट्रीट लाईटच्या समस्येबाबत रहिवासी, पत्रकार तथा ‘रायगडची झुंज न्यूज’चे संपादक नरेश जाधव यांनी कर्जत नगरपरिषदेच्या नगराध्यक्षा सौ. पुष्पाताई दगडे यांनाही दूरध्वनीद्वारे माहिती दिली होती. प्रभाग क्रमांक २ मधील नागरिकांच्या समस्येकडे लक्ष देऊन हा प्रश्न मार्गी लावावा, अशी अपेक्षा त्यांनी व्यक्त केली होती.
‘रायगडचे वादळ’मध्ये बातमी प्रसिद्ध होणे, संबंधित प्रशासनाकडून पाहणी होणे आणि त्यानंतर दुसऱ्याच दिवशी दुरुस्तीच्या कामाला सुरुवात होणे, या घडामोडींमुळे नागरिकांच्या प्रश्नांसाठी सातत्याने पाठपुरावा करण्याची गरज अधोरेखित झाली आहे.
‘रायगडचे वादळ’चे संपादक प्रभाकर गंगावणे, नरेश जाधव यांच्याकडून आभार
नागरिकांच्या मूलभूत सुविधांशी संबंधित समस्येची दखल घेऊन प्रत्यक्ष पाहणी करण्यात आली आणि दुरुस्तीच्या कामाला सुरुवात झाली, याबद्दल सा. ‘रायगडचे वादळ’चे संपादक प्रभाकर गंगावणे तसेच संजयनगर-दहिवली येथील रहिवासी, पत्रकार तथा ‘रायगडची झुंज न्यूज’चे संपादक नरेश जाधव यांच्या वतीने कर्जत नगरपरिषद प्रशासनाचे आभार व्यक्त करण्यात आले.
प्रशासनाने नागरिकांच्या तक्रारींची दखल घेऊन कार्यवाही सुरू केल्याबद्दल समाधान व्यक्त करण्यात आले. मात्र, केवळ दुरुस्तीच्या कामाला सुरुवात करून चालणार नाही, तर परिसरातील सर्व बंद पथदिवे सुरू करून ही समस्या कायमस्वरूपी सोडविणे आवश्यक आहे.
काम पूर्ण होणार का? नागरिकांचे लक्ष नगरपरिषद प्रशासनाकडे!
प्रभाग क्रमांक २ मधील दहिवली-संजयनगर परिसरातील पथदिव्यांच्या समस्येवर कार्यवाही सुरू झाली असली, तरी दुरुस्तीचे काम वेळेत पूर्ण होणे आणि भविष्यात पथदिवे नियमित सुरू राहणे महत्त्वाचे आहे. नागरिकांना मूलभूत सुविधा मिळण्यासाठी वारंवार तक्रारी कराव्या लागू नयेत, यासाठी नगरपरिषद प्रशासनाने देखभाल-दुरुस्तीची यंत्रणा अधिक सक्षम करावी, अशी अपेक्षा व्यक्त होत आहे.
बातमीची दखल, प्रत्यक्ष पाहणी आणि दुसऱ्याच दिवशी कामाला सुरुवात!
नागरिकांच्या प्रश्नांना वाचा फोडण्याचे काम ‘रायगडचे वादळ’ आणि ‘रायगडची झुंज न्यूज’च्या माध्यमातून सुरूच राहणार असून, प्रशासनानेही नागरिकांच्या समस्यांवर तत्परतेने कार्यवाही करावी, अशी अपेक्षा व्यक्त करण्यात येत आहे.
